有人話模特兒食嘅係青春飯，因此佢哋最重要係趁住風華正茂嘅時候打響名堂，甚至闖出模特兒界，朝住多方向發展。而喺索模輩出嘅南韓模特兒界中，有邊位能夠做到呢點呢？金慕雅就係最佳人辦，憑住超高嘅可塑性，令人氣高企兼「錢」途無限。
論樣貌，金慕雅甜美可愛，論身材，三圍唔算突出，而大家都知道要成為眾人嘅焦點，冇番咁上下火辣身材，實在好難做到，既然係咁，點解慕雅獲得咁高人氣呢？答案就係憑住超高可塑性。佢喺2006年投身模特兒界，最初喺多本汽車、男士及時裝雜誌中亮相，憑住甜美得嚟帶點冷艷嘅外形，而吸引到大家嘅注意。雖然佢嘅身材並非火辣級，但勝在可塑性高而廣受攝影師歡迎。有曾經同佢合作過嘅攝影師表示，慕雅最特別嘅地方就係可以隨住唔同主題，化身成配合產品及氣氛嘅造型登場，不論係可愛少女，定係成熟女強人，都可以輕易駕馭，加上高挑嘅身形，任何造型都能夠展現出無比吸引力，難怪佢出道短短日子，人氣同曝光率都相當高。2010年佢首次以車模身份於釜山國際車展中示人，可能係處女演出關係，所以表現唔算十分出色。不過隨住佢嘅演出機會愈嚟愈多，經驗愈嚟愈豐富，每次出場舉手投足都成為展場上嘅焦點。之後，佢又化身成賽車女郎踏入賽場內，人氣直線飆升。
如果大家以為佢嘅發展僅限於模特兒界嘅話，咁就大錯特錯，事關佢不但參與著名南韓歌手嘅MV演出，又有份演出電影，雖然佢表示並未有打算喺演藝界發展，但已有唔少人預計，距離呢日並唔會太遠。正當大家估佢會唔會成為藝人之際，佢竟然做咗時裝設計師，推出多個自家設計作品，呢個時候大家至發現，原來阿妹畢業於水原大學嘅時裝設計系。既然佢對時裝設計咁有興趣，點解會選擇做模特兒呢？慕雅話修讀時裝設計時，由於同學冇錢請模特兒示範作品，於是邀請佢幫手，結果喺一次演出中，佢被模特兒公司嘅星探發掘，起初佢只係諗住兼職賺錢，後來慢慢被工作所吸引，從此展開模特兒生涯。而慕雅表示一直以嚟都冇放棄過做時裝設計師嘅夢想，平時亦會親自動手為自己設計時裝，就連佢嘅模特兒朋友，都會請教佢服裝搭配嘅意見。阿妹既有外形又有時裝觸覺，雖然唔朝向演藝界發展，但喺時裝界搵到一席位。
簡介：金慕雅雖然身材唔算火辣，但憑住百變嘅造型，以及甜美嘅樣貌，叫人心動不已，難怪佢呢種特別嘅美態，唔單止為攝影師所喜愛，就連粉絲亦被佢嘅深深吸引。大家想了解阿妹多啲同睇多啲靚相，就要Click入呢個網喇！
網址：http://cafe.daum.net/moa486
出生地：首爾
身高：172cm
三圍：33、23、33
撰文：魂