政情：阿王論壇開火 狠批立會拉布
「廿三萬監察」發言人王國興（阿王）曾任三屆立法會議員，雖然已經離開議會，但仍然非常留意立法會嘅動靜。尋日阿王出席討論香港行政管治嘅論壇時，再狠批立法會拉布，火力仲依舊十足添！阿王話，佢見證咗立法會嘅變化，對近六年嘅情況特別不安同憂慮，形容議會愈演愈差、不斷墮落。
阿王話，近年拉布不斷，好似基本工程儲備基金喺死線前先獲通過，所以現時政府管治寸步難行。佢仲話，議事規則存有漏洞，所以未能掣肘反對派，令佢哋可以利用拉布，去綁架立法會同市民利益，更妨礙咗政府施政，令全港市民受害同找數，所以佢認為要參考外國設有懲罰機制。
改議事規則成唯一出路
另外，阿王仲細訴反對派嘅拉布手段，形容絕招為點算法定人數，其他手段就有提出修正案、中止議案等，佢希望下屆建制派直選議席過半，以修改議事規則去改變立法會生態，更形容除此之外已無路可走，真係講得好肉緊！