政情：反韓浪潮 何紹忠嘆內地客店內「掃貨」
韓國軍方部署薩德系統引起中國強烈不滿，內地民間更紛紛發起抵制行動。香港化粧品同業協會會長何紹忠（Joseph）爆料話，唔少做韓國化妝品生意嘅業界都受到波及，有行家嘅店舖就被內地客大肆「掃貨」，不過唔係畀錢買嘢嗰隻，而係掃冧晒啲貨落地下，然後閃人逃之夭夭，真係無奈。
化妝品生意大受影響
Joseph話，初初知道內地抵制韓貨時，以為佢哋只係唔去南韓買嘢，但原來對香港做韓國化妝品生意嘅舖頭影響都好大。睇嚟做生意唔可以太集中喺某個市場，要分散風險至得。
本身經營美容院嘅Joseph就打算去澳門開舖賣產品，以擴大客源。佢認為香港零售模式有進步空間，好似新嘅電子付款方式未夠普及，而顧客購買大量化妝品係咪可以送貨等，整個消費體驗都可以改善■！