政情：激進派勢撕裂泛民

激進派尋日舉行記者會，就將於周日舉行嘅遊行發表聲明，但出席嘅立法會議員只有社民連梁國雄、人民力量陳志全（慢必）、本土派劉小麗、朱凱廸，比較溫和啲嘅專業議政亦只有社會福利界邵家臻出席，傳統泛民白鴿黨、公民黨（公文袋）都冇人去。而參與遊行嘅團體亦只包括社民連、人民力量呢兩大激進政團、香港眾志、街坊工友服務處同朱凱廸、劉小麗團隊等，白鴿黨同公文袋同樣冇份。

聲明批評「和解」等同屈服

唔單止咁，胡志偉日前提出要求林鄭上任後特赦違法佔領行動參與者、涉濫權同打人嘅七警同退休警司朱經緯等，以換取大和解修補社會撕裂。呢件事本身已經被民主派圍插，尋日嘅聲明就再處處暗踩胡志偉嘅「特赦論」，話小圈子特首只會靠攏權力，冇人能夠代表無聲者、反抗者與政府貿然和解，批評咁樣嘅「和解」只係屈服同認命。

朱凱廸仲喺記者會上話，特首選舉後本以為會有好多對結果失望嘅人主動提出舉行抗議活動，點知反而轉吹和風，目前情況對民主運動發展不利。慢必亦指市民唔係想要休養生息，仲話應該抗爭，唔會投降，擺明寸爆胡志偉做「鵪鶉」。

多個議題現分歧難合作

雖然話溫和泛民、激進派及本土派喺今屆立法會都多次聯合行動，但近日對於財政預算案拉布同特首選舉當日去中聯辦抗議，白鴿黨、公文袋都冇同激進派及本土派一齊行動，大家對下屆政府立場亦意見分歧，似乎幾難繼續合作，睇怕都係避唔開合久必分嘅定律喇。