中環出更：審議注資迪園 葉劉倒戈撐休會
立法會財委會尋日審議政府向迪士尼樂園注資五十四億元嘅撥款，民主派議員繼續拉布。會議去到一半，有議員提出休會待續議案。向來休會議案只係得民主派支持，點知新民黨議員葉劉淑儀突然倒戈支持休會，不過議案仍然被否決，需要今朝再開會處理。
點解葉太突然支持休會？葉太話，若果迪士尼蝕錢時就要政府注資，有好大問題，所以要求提出決議案指明撥款係最後一次。佢仲話，為咗令決議案有時間討論，決定支持休會。講講吓，佢自爆持有美國迪士尼嘅股票，所以最終表決時唔會參與投票。
已退出新民黨嘅議員田北辰竟然同葉太意見一致，佢估計有關迪士尼擴建嘅投資陸續有嚟，既然投資無止境，應該趁依家糾正「喪權辱港」嘅合約條款，仲建議建制派議員否決方案，留待下屆政府處理。
蘇錦樑死撐有正面作用
面對議員炮轟，商務及經濟發展局局長蘇錦樑仍然話，預計呢項投資會有百分之五嘅內部回報，對整體經濟亦有正面作用。今次連建制議員都倒戈相向，蘇錦樑仲唔自我檢討吓？
卓妮