中環出更：記錄飄色打鐵高燕拍片搶救非遺
已被列為國家級非物質文化遺產嘅太平清醮就嚟舉行，唔少人陸續拉隊去長洲玩。香港大中華非物質文化遺產傳藝會顧問高燕最近亦密密去長洲，不過唔係去趁熱鬧，而係帶攝製隊去拍攝長洲飄色師傅黃成就嘅打鐵過程。事關黃師傅做完今年飄色活動後就會退休，日後由佢獨家製造，識轉動嘅飄色支架技術可能失傳。
高燕早幾日大清早就趕入去長洲，用咗一整日時間拍攝黃師傅打鐵嘅紀錄片。飄色巡遊最大特色係諷刺時弊，通常造型構思完成之後，打鐵師傅就會根據角色嘅姿態同埋動作，打造識郁嘅鐵枝，畀扮演話題人物嘅小朋友喺上面時可以郁動。
「識郁」鐵枝技術恐失傳
黃師傅係唯一嘅飄色打鐵師傅，佢講到明今年最後一次打鐵就收山，高燕話，咁即意味日後飄色巡遊嘅小朋友只可企定定，少咁啲傳統特色，十分可惜。所以佢急急腳搵人去拍紀錄片，至少日後若有人想做番，仲有影片可重溫。
高燕話，當日睇住黃師傅做一支支架要四、五個鐘，佢只係企埋一邊睇都覺得攰，難為七十二歲嘅黃師傅一腳踢，真係戥佢辛苦。搶救非遺嘅工作似乎應由政府帶頭，但港府最近先至成立非遺辦，起步好慢。高燕都話希望港府可以重視啲。
講到搶救非遺，自細喺內蒙古長大嘅佢感嘆話，小族語言消失嘅速度仲驚人，就連蒙語都有好多蒙古人唔識講，好似佢個女鍾凱婷喺香港出世，都一樣唔識。
生得好似混血兒嘅鍾凱婷就笑笑口話，覺得蒙語好似拉丁文，又讚自己識得講普通話已經唔錯o架喇！
卓妮