正所謂好事多磨，女文員無私捐肝感動全城，無奈好媽媽手術後因為肝功能恢復未如理想，尋日需要再度換肝。不幸中嘅大幸係有家屬願意捐出屍肝接力救人，證明生命影響生命，大愛傳承大愛，真係可以感染無數後來者o架。
照咁睇，今次活體捐肝不但唔係失敗，反而係移風易俗嘅契機，既然一個非親非故嘅活人都願意伸出援手，死後捐贈更加係何樂而不為喇。再講吖，如果唔係多得女文員無私奉獻，好媽媽可能等唔到屍肝嘅出現，佢嘅偉大義舉，值得大書特書o架。
之但係，活體捐贈唔止需要好大勇氣，亦要承受極大風險，只能迫不得已而為之。正如肝臟移植權威盧寵茂話齋，活體移植即係將原本健康嘅人變成病人，醫生壓力亦十分大。所以幾時都話，活體移植只能係權宜之計，長遠必須增加死後捐贈來源就係咁解。
可惜吖，道理係人都識講，實行起嚟又係另一回事。本港嘅死後捐贈率向來處於低水平，每百萬人只有不足六人捐贈，同文明國家每百萬人最高有逾四十名捐贈者不可同日而語。冇計喇，中國人死後「留全屍」嘅傳統觀念根深柢固，加上港府推廣不力，結果病人咪往往由等候希望變成等死囉。
港府都知衰嘞，食衞局局長高永文仲不斷諗計提高捐贈率添，一時話要搞「交叉捐贈」，一時又話要就「表明不捐贈」制度作出諮詢。即係咁，從改革制度入手無可厚非，但如果冇政策配套，都係嘥氣嘅啫。去年來港分享經驗嘅西班牙專家就講得啱嘞，當地死後捐贈率之所以高企，係因為政府成立由數百名醫生及護士組成嘅「器官捐贈統籌團隊」，與捐贈者家屬面對面溝通，減少誤解。香港嘅器官捐贈聯絡主任十隻手指數得晒，人手少成咁，唔怪得事倍功半咯。大家睇到嘞，死後器官捐贈搞極都搞唔起，登記人數咁多年都冇乜增加，主因咪就係缺乏資源囉，港府係咪葉公好龍，仲使問嘅。
老實講，自私係人嘅天性，無私奉獻嘅好人好事可遇不可求，所以唔少地方都會推行鼓勵制度，好似台灣咁吖，法例規定市民如曾捐贈器官，家人日後若有需要移植，輪候次序就會被提前，一家便宜兩家着，點解港府唔學吓呢？
佛家有云：救人一命勝造七級浮屠。本港每年有二千名等候器官移植嘅病人，生命正在倒數，將心比己，如果自己嘅家人不幸成為其中一員，都會希望有人雪中送炭。所以話，與其死後一把火燒掉，不如將器官捐出，雖死猶生，咁咪仲有意義！