政情：年管理費81萬 用得一次特首粉嶺別墅大嘥
作為特首可享有眾多福利，包括以禮賓府作為官邸，同埋於行政長官粉嶺別墅舉行活動。咁大個粉嶺別墅，過去一年嘅管理開支達八十一萬元，但係只舉辦過一次公務活動，名副其實係用嚟「曬月光」，似乎開支同使用率唔成比例囉！
下年度開支加至83萬
根據特首辦回覆立法會財委會嘅資料，二○一六至一七年度，特首喺粉嶺別墅舉行咗一次公務活動，而該年度嘅管理開支達八十一萬元，預計下年度開支將提高至八十三萬元。特首辦話，雖然特首只喺粉嶺別墅舉行一次公務活動，不過特首同家人不時會喺該處進行私人活動，而私人活動就無統計次數喇！
有議員就覺得粉嶺別墅使用率低，建議當局開放畀民眾參觀。不過特首辦回覆，基於場地限制同保安考慮，粉嶺別墅都係不宜開放予公眾。話時話，禮賓府年年都開放畀市民參觀，唔通就冇場地限制同保安考慮？