政情：漢奸黎力撐特赦論無私顯見私
民主黨（白鴿黨）主席、立法會議員胡志偉日前突然拋出「特赦論」，建議候任特首林鄭月娥上任後特赦違法佔領行動參與者，同埋涉毆打社工曾健超嘅七名警員等，以修補社會撕裂，達致大和解。胡志偉言論一出即遭全城怒轟，搞到要急急收回言論兼向公眾道歉。眾所周知，曾公然參與佔領行動嘅壹傳媒黎智英（漢奸黎）同白鴿黨關係千絲萬縷，胡志偉講錯嘢被千夫所指，漢奸黎竟然撰文撐胡志偉，真係無私顯見私。莫非漢奸黎怕自己遲早因參與佔領被捕入獄，想自己都可以獲特赦呢？
指胡志偉錯誤表達
外界對胡志偉嘅「特赦論」有唔少揣測。與多隻「老鴿」過從甚密兼被踢爆多次秘密捐款畀該黨嘅漢奸黎，尋日喺壹傳媒旗下報章撰文論及胡志偉嘅「特赦論」，話「愛民主的人同樣會犯極端的錯誤」，胡志偉話要大和解搞到被鬧，只係佢表達錯咗，但面對社會撕裂「惻隱之心誰可免」，想彌補撕裂嘅傷口係人之常情，又話「抗爭不是不可以有善意的」，暗撐胡志偉係愛民主嘅人、「特赦論」係出於一番善意，只不過係冇表達好啫，力撐「胡志偉說錯了話，但他有感而發的衝動是對的」。
佔領行動發生至今超過兩年半，警方早前先正式起訴其中九名佔領行動搞手，有關案件已進入司法程序。不過佔領行動搞手又點止九個？公然參與佔領行動，仲曾經喺金鐘佔領區畀人掟穢物嘅漢奸黎就被指為「幕後黑手」同「金主」喇！警方分分鐘會有下一波行動，將啲搞手一網打盡、繩之於法。漢奸黎力撐胡志偉，難免惹人聯想，究竟佢係贊同、支持「特赦論」，定係佢驚自己遲早落鑊，怕要坐監，所以都想被特赦呢？
講開又講，漢奸黎喺文中又提到自己係「愛吃的人」，試過食足三小時嘅高級懷石料理，又話「講起吃就極端了」。正所謂「一獄一世界」，如果佢真係鋃鐺入獄，到時就要捱美味監躉飯。懷石料理？依家有得食就好食喇！