中環出更：留任與否 張雲正考慮媽媽因素
公務員事務局局長張雲正早已踏入適婚年齡，早前被問到有冇被家人逼婚，佢就話自己會做生涯規劃，任何人去到某階段，一定要進入另一個層次，所以最緊要搵到合適嘅人，覺得舒服嘅就得嘞！佢仲自爆同已經九十五歲嘅媽媽好親近，至於考慮係咪留任下一屆政府，佢就話會唔會少咗時間陪媽媽都係考慮因素之一喎！
母子相依為命多年
張雲正話爸爸喺佢十四歲時已過身，過去一直同媽媽相依為命，形容媽媽係佢最緊要嘅人。媽媽對佢冇咩特別要求，只要開心就得，由於媽媽年事已高，所以依家同媽媽住嘅地方好近，路程只係一分鐘。
被問到會否擔心如果日後工作更忙，少咗時間陪媽媽，張雲正就話依家其實都唔係好夠，直言好多嘢都要有抉擇。至於呢件事會否係佢考慮留任下屆政府嘅因素之一，張雲正就反問「點可以唔係呢」？睇嚟佢都係個孝順仔。
卓妮