中環出更：黃偉綸開會神遊日本
立法會工務小組尋日開會，審議涉及二億八千幾萬元嘅港鐵南港島線東段主要基建工程嘅追加撥款，同埋涉近二十六億元嘅沙嶺墳場興建骨灰安置所土地平整及基礎設施工程。面對億億聲嘅工程撥款，代表政府出席會議嘅發展局常任秘書長黃偉綸竟然無心開會，低頭睇日本旅遊資訊。黃偉綸被篤爆之後只係解釋「google有好多資訊」，今次斷到正佢都無得否認喇！
官員或議員被發現出席立法會會議時心不在焉並非首次，前議員何俊仁亦在開會期間瀏覽性感艷照，從此被稱為「AV仁」。但人類總要重複同樣嘅錯誤，尋日兩小時嘅會議中，黃偉綸大部分時間都頭耷耷玩手機。卓妮發現黃偉綸正埋首研究日本資訊，照片所見佢手寫搜尋「阪」、「牛」，仲睇富士山資料及日本實境地圖，個心直情飛咗去日本。
事後尷尬認與會議無關
對於開會時計劃旅程，黃偉綸會後尷尬承認有瀏覽日本資訊，不過強辯話「google有好多資訊，有睇到香港亦有睇日本」，但承認資訊同會議無關，至於自己嘅行為合適與否，就交由公眾評論，然後急急腳離去。雖然黃偉綸無心開會，不過工務小組都開過三次會議討論，議員拉布都拉到悶，結果南港島線工程追加撥款終獲通過。
卓妮