一橋兩制拖後腿 香港速度佗衰家

啱啱之嘛，位於拱北口岸地下嘅拱北隧道舉行全隧貫通儀式，意味全長十三點四公里嘅珠海連接線主體工程，如期今年十二月實現通車高唱入雲。好嘞，內地同澳門段順風順水，咁香港呢邊情況又點呢？

講出嚟都羞家，香港段工程一波三折，甩漏多過食飯，超支勁過人，連工業意外傷亡人數都多過人，以致通車日期一延再延，按照依家嘅進度，今年年底通車睇怕都係凍過水，堂堂國家級基建工程隨時淪為國際笑話，你話係咪佗衰家吖。仲有吖，即使大橋主體順利通車，作為配套工程嘅屯門至赤鱲角連接路至今十畫未有一撇，咁即係點？即係成條大橋等於廢咗武功囉。

以前香港好多人嫌內地貧窮落後，到依家強國土豪荷包腫脹，又改口話香港制度先進，「香港製造」比「中國製造」品質優良。依家大家睇到啦，同一條大橋，香港呢邊進度大落後，由最開頭受到司法覆核挑戰，到工程撥款喺立法會內被無良政客拉布狙擊，好大程度就係因為「制度」掣肘。

至於工程質量咯喎，就更加係黃腫腳不消提，大橋香港段施工六年多以來意外頻生，已經奪去十位工人性命，「血淚大橋」臭名昭著。淨係工程違規被當局要求暫時停工就超過六百日，「香港製造」有幾高質素，心照喇。

一滴水睇穿整個世界，一條橋亦見證香港同內地競爭力嘅消長。以前「香港速度」作為高效率嘅代名詞，一早就被「中國速度」所取代。好似內地最近拍板興建河北雄安新區，承擔北京部分非首都功能，唔少人就估計以內地當局嘅行政效率，十零年內有望成事，以新區二千平方公里嘅發展規模計算，差不多等於兩個香港，都咪話唔得人驚。

唔怕貨比貨，最怕唔識貨，當中國喺南海造島嘅速度，連美國佬都嚇一跳嘅同時，香港起一個人工沙灘幾年都未見影，兩者根本唔喺同一個層次。魯迅講過，中國改革難過登天，連搬張枱裝個火爐都要流血，形容今時今日香港可能更加貼切。

講起真係可悲，當年鄧伯伯提出「一國兩制」，香港五十年不變，好多人幻想最終會變成「一國良制」，內地跟香港嗰套走，家陣實踐證明，兩制優劣立見，掉番轉頭就差唔多！