民建聯（民記）尋日宣布新一屆領導層名單，領導層人選大致不變，但今屆就巧立名目新增三名副秘書長職位，包括觀塘區議員洪錦鉉、黃大仙區議員黎榮浩同深水埗區議員鄭泳舜。據知，新增副秘書長一職，係因為今屆領導層不變、加上立法會議席又僧多粥少，令到唔少第二梯隊上位無望，黨內亦擺唔平各方勢力，所以要新增領導層職位，安撫內部不滿情緒。
民記新一屆領導層，主席、副主席以及秘書長同副秘書長都維持不變。至於三名新副秘書長係洪錦鉉、黎榮浩同鄭泳舜，一直都有指三人曾爭取出選立法會，前二人都屬於九龍東，今屆已無緣競逐立法會選舉，而鄭泳舜同葉傲冬目前仲爭緊出選九龍西補選，早前內部已有投票結果，但到依家都未公布，唔知為乜咁神秘？
據知，唔少第二梯隊都不滿上位無望，亦令內部形成一種不滿嘅情緒，新增呢三個副秘書長嘅職位，就係要安撫呢班第二梯隊，雖然只係黨內職務，亦只係一個名目，但總算進身民記領導層。其實呢個做法，亦同早前民記公布五十三個中委名單如出一轍，名單約半數係新界人，其中單係新界東都佔十三個。據知都係為咗安撫，令大家唔好作反。
民記啲嘢成日收收埋埋，冚埋咁多內部不滿，以為唔講就冇人知，等到爆煲先嘗試補鑊，呢邊要安撫，嗰邊又要安撫，花咁多精力做埋呢啲無謂嘢，個黨點會有運行吖！