政情：備戰補選？余德寶學調解練口才
坊間成日都叫啲年輕人自我增值，公民黨（公文袋）嘅油尖旺區區議員余德寶，近排就去咗上調解員課程增值下自己，仲話上完堂之後發覺學到嘢，可以練到口才。點解要上調解堂練口才呢？盛傳佢會出選立法會九龍西補選，唔通係為競選論壇駁火備戰？
雖然佢冇透露上堂係咪同選舉有關，只係話上堂學到嘅提問技巧好有用。之不過，要做調解員，唔係齋上堂就得（口架）喎。佢話仲要考多兩個試，同埋要多三年工作經驗先符合資格，而佢依家就淨係上晒啲堂，工作經驗方面都只係得一年幾，所以打算邊儲經驗邊考試。
佢又話做咗區議員之後都未係好忙，仲有時間返屋企食飯，但自從做咗公文袋執委之後，工作量增加，搞到依家一星期可能只得一兩晚係喺屋企食。但忙成咁，又點樣去上調解員堂呢？佢解釋，話佢所報讀嘅中心，每堂要由朝早九點上到傍晚六點，但好彩只係需要上六堂。而且佢話成個課程要成萬幾蚊，再加埋兩次考試，加埋都要使成兩萬幾蚊。難怪佢都話，若然考試衰咗都幾甘，所以要努力喇！