政情：藍王雲仙為夫棄澳日居留權
日本係香港人外遊嘅最愛，好多人去日本玩頻密到好似返鄉下咁。博愛醫院總理藍王雲仙（Mina）都成日往日本跑，但佢唔係「哈日一族」，而係返去探媽媽。Mina笑笑口話，佢自細同媽媽移民日本，幾年前嫁畀善德基金常務副主席藍國慶之後，媽媽唔肯搬返香港住，因為佢要照顧東京屋企附近嘅幾十隻流浪貓、狗喎。
早前我哋喺一個活動見到Mina同埋佢媽媽Masako，Masako好關心流浪貓狗，東京嘅屋企收留咗三隻貓、一隻狗，另外喺外面餵食幾十隻貓狗。Mina話媽媽經常講，人可以選擇自己命運，但動物嘅命運就要靠人類，所以佢除咗餵食同收養之外，仲喺屋企後面整咗好多安樂窩，畀貓狗喺天冷或落雪時避寒，真係有愛心。
話時話，Mina喺日本長大，唔知有冇入籍呢？佢就自爆原本擁有日本同澳洲嘅居留權，但為咗老公就放棄晒喇！