政情：田二少跳船新民黨內傷葉劉點撐？
不敵七年之癢，新民黨副主席兼立法會議員田北辰（田二少）連同六名區議員，尋日召開記者會宣布退黨。田二少同一齊創黨嘅主席葉劉淑儀「分手」，最直接嘅影響係該黨嘅立法會議員由三變二，加上葉劉年紀唔細，邊個接到葉劉嘅棒成疑問，而容海恩又仲係新丁，喺田二少跳船之後，政治版圖亦隨之縮細。該黨今次「內傷」，令黨嘅發展前景都唔樂觀，究竟葉劉仲撐唔撐得起個黨呢？
田二少話同葉劉理念上有分歧，而選擇喺呢個時候退黨，係希望對黨造成嘅負面影響減到最小。他又話「理念唔同就係唔同」，例如喺一簽多行嘅問題上，他贊成封頂，但葉劉反對，擔憂日後「田北辰好高民望，葉太又好高民望，但新民黨唔知代表乜。」所以之後就萌生退黨嘅想法。
聲稱黨內團結 培育新人
先後兩次退出政黨，田二少承認要自我檢討，認為兩次都係「因誤會而結合，因了解而分開」，又話自己對事唔對人嘅理念係一條孤獨嘅路，並否認自己係建制派第二個壞孩子。
其實，田二少退黨有迹可尋。葉劉話佢喺連任立會議員後，隨即喺立法會大樓申請調房，務求要遠離新民黨另外兩名議員，反映佢當時去意已決，依家見到佢「選舉有成，想做番單身貴族」，更直指「凡係男人都鍾意多空間，我都好明白」。佢又對早前指田二少喺組黨後先可以勝出，否則只會好似西貢區議員方國珊一樣嘅言論，表示可能冒犯咗佢，所以收回言論，並向佢道歉。
雖然田二少跳船，但葉劉話唔會影響黨內士氣，反而會更加團結，因為留落嚟嘅議員都係好支持新民黨，而佢哋月初曾舉行退修會，該黨未來將會更積極參與議會同地區工作，依家該黨喺新界西仍有五名區議員，佢話會繼續培育新人，下屆立法會選舉，亦必定會派人喺新界西出選，而佢亦會出選港島，問題只係自己會排第幾位出選。
隊友頓變對手 難穩軍心
葉劉咁講睇嚟只係想穩定軍心，事關冇咗田二少，新界西嘅政治版圖幾近全面失守，點會對個黨冇影響，尤其新民黨要結合公民力量先捧到容海恩上場，可見地區樁腳幾咁重要。新界西冇咗逾半區議員，亦唔係一時三刻可以培養到另一批上場，仲有田二少都會擴張自己嘅地區勢力，雙方由隊友變成競爭對手，睇嚟葉劉都好難搶番田二少個立法會議席，兼且佢已經六十六歲，都仲未搵到人接棒，諗起都「心震」喇！所以新民黨今次「內傷」，都唔知幾時先可以復原喇！