中環出更：被指濫權 蔣麗芸遭泛民包圍
立法會教育事務委員會主席蔣麗芸（Ann）又惹爭議。立法會教育事務委員會原定尋日開會，就下月舉行小三基本能力評估研究計劃（BCA）進行討論，教育局就邀請咗二十三名舊年曾參與小三全港性系統評估（TSA）試行計劃嘅學校代表出席，班泛民仲衝上主席台試圖圍阿Ann，又舉起紙牌抗議主席濫權，自行畀局方請啦啦隊上嚟撐政府。最終會議重點轉移，原本獲邀嘅學校代表全部無機會表達意見，會議就結束咗嘞！
允局方請學校代表惹議
多名議員喺會議上提出，根據議事規則，委員會如要邀請非政府代表出席，需事先諮詢委員會，質疑阿Ann未有按議事規則，事先諮詢委員會意見，就自行決定畀局方邀請學校代表出席，「啲代表只係做教育局啦啦隊」，企圖向反對聲音「滅聲」。唔少議員要求委員會召開公聽會，容納正反兩面的聲音。
一班泛民議員仲衝上主席台試圖圍阿Ann，仲舉起紙牌抗議，公聽會淪撐TSA大會，而阿Ann晦氣咁話啲議員「你講完未呀」，又話「今日唔係公聽會，你唔好搞錯」，令現場氣氛火上加油；佢仲死撐係按照慣例咁去做，但佢都應承之後會再搞場公聽會。由於會議期間只係就呢個問題爭拗，所以阿Ann多次宣布休會。直到接近原定會議結束時間，佢話對事件表示遺憾，宣布會議結束。
卓妮