中環出更：日行六千步董吳玲玲減肥有法
仁濟醫院董事局早幾日換屆，前主席董吳玲玲亦有嚟撐場，仲撞到喺香港婦聯嘅好友、立法會議員麥美娟（Alice），兩人一見面更互讚對方成功瘦身。董吳玲玲話以往一直有晨運習慣，但早年擔任仁濟主席時太忙，所以放棄咗一排，期間佢體重就飆升咗廿磅，所以佢一卸任就即刻重新做運動，每日朝早步行一個鐘，行得快可以有九千步，慢慢行都有六千步，先可以減到磅。
有人靠運動，Alice就靠控制飲食，佢話入咗立法會根本冇時間做運動，所以就限制自己每日傍晚六點前食晚餐，之後就唔再食嘢。咁有時啲會議開到七、八點咁點算呢？佢話會叫助理中途拎晚餐畀佢，又話已經練到可以喺十分鐘內食完晚餐，唔驚影響會議。
其實都多咗唔少新面孔入董事會，好似潘蘇凱欣同周碧淵兩位女士都係首次加入。其中潘蘇凱欣嘅媽咪正正係另一前主席蘇陳偉香，原來當年蘇陳偉香做咗主席後，就係靠囡囡潘蘇凱欣接手打理生意，今次輪到喺仁濟接媽咪棒，使唔使放手事業呢？蘇陳偉香就話囡囡喺董事局好多嘢要學，又分享經驗，話除非擔任副主席，否則工作量都唔會太重，兼顧事業應該無問題。
嚴徐玉珊嘆少咗見愛孫
至於新主席嚴徐玉珊就話自己好緊張，用咗成晚去度演詞，咁佢亦不負眾望，順利完成交接。做主席責任重大，嚴徐玉珊都預計任內會少好多私人時間，又話最可惜係少咗見孫仔，好彩新抱識做，每個星期都帶孫仔去搵佢，令佢唔使成日心掛掛。而嚴徐玉珊丈夫、另一前主席嚴玉麟就話大環境日新月異，好謙虛話無咩做主席嘅經驗可以分享畀老婆，反而大讚對方識得用科技，例如通訊軟件去同董事局成員聯絡，增加大家之間嘅溝通添！
卓妮