古人話：少年智則國智，少年強則國強，少年進步則國進步，可惜現實同理想始終係兩回事，眼見今日學生欺凌事件不絕如縷，大學校園更頻頻爆出性醜聞，呢個社會想有運行都難。
港大日前爆出學生舍堂幹事會參選人畀二十人喺下體滴蠟事件，以為咁已經夠離譜喇，點知一醜未平，一醜又起，網上再驚傳疑似港大舍堂集體性欺凌嘅片段，一名男生被另外幾名男生強壓床上，被人用下體拍打頭部，雖然受害人不斷掙扎，但施虐者唔單止不為所動，仲大叫大笑，粗口橫飛，整個過程極盡猥褻，真係睇見都眼冤。
講真，淫風入侵校園，已經唔係一朝一夕嘅事，各大專院校每年搞嘅迎新營，happy corner、男生舔女同學大腿……唔淫賤唔玩，只係勢估唔到依家居然出動埋SM道具，甚至「動刀動槍」，咁就唔係意識不良咁簡單嘞。正如法律界人士話齋，只要事主唔係自願，已經構成非禮罪，分分鐘監都有得坐；而其他強按事主嘅人，有機會構成教唆非禮罪；至於上傳影片嘅，更有可能觸犯發布淫褻物品罪添！
咪以為淨係大學校園烏煙瘴氣，中學校園都唔好得幾多。某百年名校最近驚傳女更衣室偷拍事件，據聞情況持續超過半年，有人仲沙膽到將片段上載雲端分享，結果斷正收場，呢啲咪「長江後浪推前浪，一代新淫勝舊淫」囉。
青少年喺咁嘅「校園文化」薰陶下，後果不問可知。老一輩成日話讀完大學打寫字樓工，將來可以出人頭地，依家啲「天子門生」就唔同嘞，有人下海搵真銀以「做鴨」為榮，「上進」少少嘅，深明「勞心者治人，勞力者治於人」嘅古訓，索性自己做埋管理層。警方日前搗破一個援交淫網，唔少負責人就係大學畢業兼具相關資訊科技訓練。
點解啲後生仔搞成咁？有專家話係因為睇得AV多，有樣學樣喎。咁又係吖，互聯網時代色情資訊唾手可得，加上不良傳媒長期宣淫販賤，後生仔女近墨者黑，近黃者鹹，想唔學壞都難。當然喇，嗰班所謂教育工作者亦係難辭其咎，有啲人一味鄉愿，對於年輕人行差踏錯，從來只識曲意寬容，校園淫風四起固然唔敢大聲指摘，即使面對學生荒廢學業，醉心做街頭鬥士，亦唔敢出嚟主持公道，反而盛讚佢哋「為天地立心，為生民立命，為往聖繼絕學」。至於嗰班鼓勵學生「違法達義」嘅政治教師，荼毒青少年，更加係等而下之。
講起真係可悲，今時今日香港師不師，生不生，成個社會有咩辦法唔是非顛倒，黑白混淆吖！