青年新政游蕙禎因宣誓辱華而被取消立法會議員資格後久未蒲頭，日前網上流傳佢同友人拍攝嘅旗袍合照，繼「扑嘢論」後又引來網民熱議，有人罵她一方面支持港獨，話要擺脫華夏文化，但又身穿旗袍拍照，豈不是自相矛盾？游接受查詢時就話旗袍係香港舊有服飾，叫大家唔好太敏感。
旗袍冇錯係香港舊有服飾，如今仍有女子名校以旗袍為校服，而多數選美的環節，除了泳裝亦會有旗袍，可以想像，穿着旗袍予人典雅的印象，一些有氣質的女星，更可以穿出嫵媚的動人風情。然而，老朽難以聯想以粗言侮辱自己民族嘅游蕙禎，穿起旗袍會叫人另眼相看！有所謂「國師」就話：「青年新政酬謝各位去年投票支持，他們會在補選再來。現在，他們開始選戰的文化品味宣傳了。」
講開補選就眼火爆，游蕙禎同梁頌恆被取消議員資格，二人所屬的九龍西及新界東直選議席懸空，政府要花巨額公帑進行補選，這還不是要港人埋單？講乜鬼「文化品味」宣傳啊！分明係醜人多八怪，不甘寂寞，玩嘢「刻奇」而已。刻奇（kitsch）一詞源於歐洲，有學者話最初以「媚俗」的譯法進入中國，亦有指是「刻意追求新奇」的縮寫語。
游蕙禎的政治前途已經玩完，其「刻奇」無非想吸引他人眼球，早前農曆新年佢就以一身華服現身，自嘲係「油雞」同市民拜年；這些誇張、戲劇化的自我演繹，老朽認為是一定程度的偽善。有人話呢種情況通常會出現在某些知識分子身上，好似俄國文豪托爾斯泰，佢一直宣傳自己愛人類、愛世界，查實佢道德生活一團糟，性欲強烈又沉迷賭博，他活在自我想像的道德世界中。游蕙禎粗鄙無文，固然不能同文豪比較，之不過「刻奇」冇問題，唔該先還清之前領取嘅議員薪酬同相關開支近百萬元，否則你即使扮武則天都係冇得傾！