政情：鄭家純5.5億投粉紅之星紀念彤叔

今次競投由周大福主席鄭家純（純官）親自主理，並已將「粉紅之星」命名為「周大福粉紅之星」（CTF Pink Star），以紀念其父周大福創辦人鄭裕彤（彤叔），以及周大福八十八周年誌慶，意義深遠。據知，喺鑽石拍賣前，純官有親身鑑賞呢枚稀有寶石，更由負責拍賣嘅蘇富比亞洲區CEO程壽康陪同將寶石試戴上手，因為今次競投極具紀念性，寶石一定要有足夠分量同完美無瑕，所以純官要親自上場，透過電話競投。

笑言自己係通天曉 好清楚公司啲嘢

純官早前身體不適入院，但已經出院多時，健康進度非常理想，尋日佢跑步做運動時精神奕奕，狀態十足。純官大方接受本報獨家訪問，談話中不失向來幽默本色，問到佢依家嘅健康情況，即刻笑笑咁話：「你見到我跑步o架！咁掂唔掂先？冇事（身體），小問題啫！好快又出嚟同大家見面。」事事愛親力親為嘅純官，喺休養期間都不忘工作，仲打趣話：「公司啲嘢我好清楚，夥計唔使諗住可以偷懶，我係通天曉乜都知。」

純官親自上場，透過電話投得呢枚「粉紅之星」。（資料圖片）	純官跑步做運動，狀態十足。	純官邊跑邊說：「好快又出嚟同大家見面。」

對於以破世界紀錄投得「周大福粉紅之星」，純官話今次有特別意義，本身呢枚鑽石係鑽石中嘅極品，佢認為「我哋品牌要擁有嘅！」又話：「已經將CTF Pink Star納入周大福稀鑽可收藏之列。」一提起工作，純官零舍醒神，難怪佢同記者道別時都不停咁話要盡快復工。

其實今次競投仲有小插曲，純官不容有失親自喺電話參與，最後成功奪得心頭好，純官咁緊張，足見佢對父親鄭裕彤嘅敬愛，為咗紀念亡父，同埋父親一手創立嘅周大福八十八周年誌慶，不惜天價投得呢枚稀有珍品。