中環出更：傳羅致光做局長 商界急打毒針
新一屆問責班子嘅人選傳聞滿天飛，其中盛傳係勞工及福利局局長嘅人選之一，就係民主黨（白鴿黨）成員、扶貧委員會轄下嘅關愛基金專責小組主席羅致光，有商界人士最近急打毒針，批評羅致光過於福利主義，反撐另一名盛傳會出任局長人選、勞福局常任秘書長譚贛蘭。
力撐譚贛蘭掌勞福局
外界一直有指羅致光同候任特首林鄭月娥喺扶貧委員會合作多時，羅致光就關愛基金嘅措施，亦曾多次到立法會解畫，盛傳佢係勞福局局長嘅熱門人選，但佢先要面對白鴿黨反對黨員入閣嘅立場，若要入閣便要退黨。此外，由於佢協助基層嘅鮮明立場，商界最近急急打毒針，批評佢過於福利主義，未必能顧及香港整體利益，而譚贛蘭則僅為公務員，相信佢一直只係跟指示行事，認為譚贛蘭較合適。
另外，立法會金融服務界議員張華峰尋日與傳媒午宴時提到，財經事務及庫務局局長陳家強若留任下屆政府，亦可以考慮，形容對方工作雖然有少少hea，但可能同上司有關，如果加入下屆班子，上司唔同咗，可能就會唔hea，又讚佢熟悉政策及平穩，向佢反映經紀問題時，佢亦願意聆聽。
卓妮