中環出更：廖湯慧靄恨抱孫仔女未婚好頭痕
港區婦聯代表聯誼會（婦聯）早前舉行就職禮，逾百名婦女齊去見證卸任會長葉順興交棒畀新會長王惠貞。紀惠集團主席廖湯慧靄同埋姪女、仁濟醫院總理湯振玲都有出席。湯振玲婚後即成功追到個仔，依家已經六個月大，唔知廖太恨唔恨抱孫呢？廖太笑笑口話希望快啲，但阿仔廖偉麟同女兒廖偉芬都未結婚，諗起都幾頭痛。
話口未完，廖太就話依家興一種講法，就係男人最好四十歲後先結婚。因為依家啲人太長壽，如果太早結婚生仔，仔女長大後，父輩們仲有心有力，但就會被迫交棒退休。所以若遲少少先成家立室，就可以玩到七十歲。
蔡冠深唔想咁快做阿爺
中華總商會會長蔡冠深嘅太太蔡關穎琴（Janice）聽罷，笑稱係第一次聽到呢種講法。不過佢老公蔡冠深就叫仔女唔好太早結婚，就算結婚都唔好太早生BB，因為佢唔想變成老爺或者阿爺，佢覺得自己仲好後生喎。
卓妮問番新手媽媽湯振玲湊BB辛唔辛苦，佢就話都算OK，最辛苦係餵母乳，但好彩有媽媽幫手湊BB，所以當晚佢仲可以出來鬆口氣。
講番就職禮，王惠貞話來屆希望團結及聯繫更多專業婦女人士，為社會做更多嘢。其次，青年工作都好重要，佢話坊間社團組織帶年輕人去交流、實習就做得多，所以佢特別想幫青年創業。佢又話青年婦女只要有創意，一經揀選除咗可獲資金支持，仲可以喺專業人士協助下成立公司，將意念落實。
卓妮