一手交錢，一手交貨係商業社會最基本原則，但其實凡事都有例外。好似部分美容院咁吖，收咗客人錢唔使提供服務，無本生利一年賺足廿億，抵佢哋豬籠入水！
有政黨比較過七間上市美容集團嘅財務報表或招股書，發現唔少資金都係依賴客戶預先購買美容套票，其中過期合約更佔收入超過三成，比其他行業嘅百分之二高一大橛。以現時本港皮膚護理服務收益總額七十億元計算，估計消費者每年二十億元就係咁無喇喇倒咗落鹹水海，都咪話唔得人驚。
可能有人問，客人又唔係傻嘅，明知用唔晒點會買咁多套票呢？之唔係銷售手法有景轟囉。其中一個求助個案，兩母女花四萬幾銀幫襯美容公司購買每人五十次療程，點知錢就畀咗，想約技師仲難過登天，等到合約就快到期仲有大量療程未用，店方又以為舊療程延期為由，游說買多三萬蚊，事主見洗濕咗個頭，惟有焗住落疊，結果細閱合約條文至發現，原來每次療程最少要相隔廿一日。咪玩啦，一年得嗰五十二個星期，除番開根本冇可能做足五十次，即係擺明搵老襯喇！
上述手法其實只係冰山一角，最絕嘅一招係，職員喺你用套票嘅時候加多幾錢肉緊不斷推銷，你肯就範固然無任歡迎，掠多你一筆何樂而不為；你怕煩索性放棄套票咩，佢哋亦樂得印印腳數銀紙唔使做，公就店家贏，字就消費者輸，你點都唔夠佢玩。最慘係消費者事後追討，好多時涉事公司都會作幾百種藉口，唔係賴唔知情，就係話已經炒咗個職員，再唔係就承諾提供番簽多咗嘅套票服務，到頭來可能都係吹佢哋唔脹。
冇錯嘞，預繳消費亂象多多，數到天光都數唔完。除咗氹啲客買唔會用得晒嘅套票，其他如反鎖顧客喺房，強迫碌卡過數，甚至趁女士們寬衣解帶後疲勞轟炸，總之就係無所不用其極。消委會舊年接獲四千七百幾宗同預繳式消費有關嘅投訴，涉及金額較前年勁升六成，除咗美容業呢個重災區，涉及健身及瑜伽中心嘅投訴更加急增兩倍，可想而知情況有幾嚴重。
社會各界講到口水都乾嘞，要徹底解決問題，歸根究柢都係為預繳式消費設立強制冷靜期，消費者期內可以隨時取消合約咯喎，無良業界逼到氹到個客簽單都冇用。可惜吖，市民有市民嘈，官老爺好似借咗聾耳陳隻耳，淨係要求業界自律，結果係點大家有目共睹。
始終都係嗰句，民生無小事，港府連保障消費者權益都懶懶閒，關人個關，想唔認冇靈魂冇神經都唔得喇！