政情：蕭嘉怡奮力搣甩「地獄廚神」
因為曾被指烹煮雞隻唔夠熟，中西區區議員蕭嘉怡（Kathy）被稱為「地獄廚神」，尋日佢又再下苦工，同囡囡合作炮製缽仔糕，廿四個成品更全部食清光，直言「好食過街買」。之不過，佢都自嘲依家嘅廚藝只係由十八層地獄，縮短到十五層地獄。睇嚟要搣甩「地獄廚神」嘅稱號，仲有好長嘅路。
孖囡囡炮製缽仔糕成搶手貨
廚藝點先可以有所提升？Kathy透露，有好友得知佢有「地獄廚神」嘅稱號，於是送咗部大熱嘅日本電熱鍋畀佢磨練吓，佢早前已聯同一眾好友成功煮出章魚燒，而尋日嘅缽仔糕更喺一個鐘頭內就完工，進度可謂非常理想。但仍有唔少人畀佢「地獄廚神」稱號嚇親，包括Kathy嘅助理都勸佢咪返辦事處整嘢食。
雖然係咁，但Kathy話老公每次都為佢煮嘅食物包底，而且從未因此病過。佢更對自己廚藝有信心，稱過往因工作忙碌先冇鑽研，又認為自己有天分，再加上今次依照食譜，摸索下都能夠做出搶手缽仔糕，所以佢話依家已經進步到十五層地獄嘞！