中環出更：馬清揚譚鎮國自爆入廟犯禁
尋日係清明節，唔少人上山掃墓祭祖，一向重視傳統文化嘅東華三院亦按習俗，安排一眾董事局成員由剛上任成為主席嘅李鋈麟帶領下，到旗下多間祠廟拜祭先賢，慎終追遠。
一班東華董事局成員尋日朝早先後到廣福義祠、文武廟、善德宮、列聖宮、東華義莊同骨灰庫巡視兼上香參拜，主席李鋈麟喺參拜完文武二帝後更不忘摸一摸後殿旁嘅大關刀，冀過五關斬六將。
細個踩門檻 食未拜神生果
講起傳統祭祀儀式中多種宜忌事項，好多人都可能聽過吓，但真正熟悉嘅人則愈嚟愈少，東華副主席馬清揚同譚鎮國就透露曾經甩轆過。譚鎮國細個時同好多小朋友一樣，一入廟見到門檻會就咁踩上去，後來先知原來門檻係要「檻」過去先啱嘅。佢又話身邊親友都有拜神習慣，有時佢哋會將多支較粗身嘅香燭一齊點燃，一燒就成紮火把咁，最初佢都不知所措，後來有親戚教佢將燃燒中嘅香燭先稍微向下斜放，再一下舉起，就唔會咁大火喇！
馬清揚就諗起細個拜神見啲生果咁新鮮即刻攞嚟食，後來先知要拜完神先食得，不過依家就梗係唔會啦，加上入咗東華之後出席過咁多大大小小嘅傳統儀式，對呢類習俗嘅認識可謂大大提高。
同場仲有副主席王賢誌、蔡榮星、文穎怡同總理何猷啟等。呢日帶埋朋友到場嘅王賢誌話，好多喺外國讀書或年輕一輩嘅香港人，其實都好想認識同知多啲有關於呢類傳統文化嘅詳情，但唔係經常有機會親身體驗，所以佢一有機會就會帶埋佢哋一齊過嚟，希望咁有價值嘅傳統能夠傳承落去。而佢爺爺當年離世之後亦曾暫存喺東華義莊一段短時間，因此重臨呢個地方對佢亦有另一番意義。
卓妮