行行企企食飯幾味，係唔少打工仔嘅終極夢想，可惜吖，家陣惡搵食，做到隻積咁嘅樣就有份。不過世事無絕對嘅，有種職業唔止高尚，仲可以得閒喺辦公室畫吓畫附庸風雅一番，好爽o架。
邊個咁爽？之唔係理應鐵面無私嘅法官囉。屯門法院有位裁判官對畫畫非常有興趣，不惜重金禮聘老師上門教畫。本來呢，只要上嘅門係自己屋企，用嘅係私人時間，無論畫畫定撚雀都冇人理你，之但係呢位裁判官就唔係咁玩法，除咗請畫師到法院辦公室教畫，仲擅自讓畫師佔用法院嘅泊車設施添。
正所謂，若要人不知，唔好咁低B。呢位裁判官話就話利用午飯時間學畫，但實際係點只有佢自己最清楚，再講吖，法院係審案嘅地方，必須保持莊嚴，將法院地方當成畫室，大模廝樣做私人嘢，根本就係不務正業，有礙觀瞻。何況佢仲將法院泊車設施當成私人停車場，任由外人使用，即係公器私用啫，即係以權謀私啫。嗱，有人睇唔過眼向司法機構投訴，結果院方亦認為有關做法唔恰當，仲將事件刊於年報，呢單醜聞咪通晒天囉。
睇見就眼冤，堂堂法官其身不正，冇規冇矩，同知法犯法冇乜分別，想唔嘆句「世風日下，道德淪亡」都唔得喇。唔係咩，法官嘅工作係審案量刑，本身有極高嘅社會地位，如果連佢哋都公私不分，想點就點，公眾仲可以信賴法庭公正咩？仲會對法律有敬畏之心咩？所以話，咪睇件事好似好小兒科，其實茲事體大，正如前立法會議員話齋，司法人員行為不當，性質嚴重，絕對唔可以喺年報輕輕交代就算，況且司法機構「自己查自己」，擺明官官相護，好肉酸啫。
即係咁，法官係人唔係神，犯錯一啲都唔出奇，但奇就奇在冇監督機制。好似今次呢單畸士咁，裁判官雖然被指做法不恰當，但到底有冇受到懲罰，根本冇人知。今時今日乜都講求透明，乜都置於陽光之下，司法機構居然無王管，點都講唔通。好似警察有監警會，律師有律師公會，政府部門亦要接受審計署、申訴專員公署及立法會監督，偏偏法官例外，唔通佢哋真係大晒咩？講真，前特首曾蔭權爵士之所以淪為階下囚，咪就係無王管之過囉，唔通呢個教訓仲唔深刻咩？
自從佔領之亂後，法官判案往往激起唔少爭議，早就有人建議成立監督平台，向法庭建議量刑指引，唔係冇道理o架。你知啦，法治及廉政係香港最重要嘅基石，如果連法庭及司法人員都走樣變形，一國兩制就真係唔慌唔玩完咯。