政情：fb晒濕身照 卿姐學潛水圓夢
前立法會議員、民主黨前主席劉慧卿（卿姐）離開議會後享受退休生活，卿姐尋日就喺facebook分享一張「濕身照」，話剛完成潛水課程，仲話要一圓多年來嘅心願，下個月要去菲律賓真‧潛水添！
卿姐接受查詢時話，自己於二十幾年前曾經多次遠赴澳洲大堡礁學潛水，但當年因為喺海中學習，加上面對兩大關口，分別係突破唔到將口中呼吸器吐出，再重新戴上，以及將入水面鏡嘅水清走，最終因而放棄，當時剩係浮潛睇珊瑚就算數。
下月去菲律賓真‧潛水
卿姐話，一直都無諗過再潛水，但一批民主黨黨友邀請佢下月一齊去菲律賓潛水旅行，佢先搵教練重新學習，尋日係第一日上堂，因為去游泳池學恐懼相對細，依家學習進度都好理想，遲吓會上多一次潛水堂及理論堂，就可以考潛水牌，到時就可以正式潛水喇！