政情：「後王坤」時代狂追張炳良屋數
基層市民輪候上公屋嘅時間屢創新高，最新公屋輪候冊嘅一般申請者平均上樓時間已長達四點七年，當局一直掛在嘴邊三年上樓嘅承諾已一早幻滅，運輸及房屋局局長張炳良被指對呢個局面責無旁貸，一直關注基層市民住屋訴求嘅公屋聯會（聯會），雖然已出任主席長達廿一年嘅王坤退下火線，聯會副主席文裕明「升呢」接棒主席，王坤預先為接班人開出「期票」，講到明接班人要繼續向政府追數，要求交代幾時回復三年上樓嘅承諾同埋要繼續完成長遠建屋目標，張炳良等高官於「後王坤」時代，都咪使幻想以為可以「甩難」或者抖吓氣嘞。
公屋聯會前日舉行執委會互選新領導層，結果加入聯會廿一年嘅文裕明以大熱當選聯會新主席，副主席數目就原來六個減至四個，踏入「後王坤」時代，文裕明嘅擔子唔會比王坤輕，事關一來要繼續聯會最高層不畀政黨介入嘅傳統，重中之重係撥亂反正，要從速向政府「追數」，兌現番已偏離多時嘅公屋輪候冊三年上樓嘅承諾。
住屋問題未解決 三任特首捱轟
雖然王坤呢位重炮手不再企喺最前線，但始終係聯會嘅代表人物，佢呼籲接班人要毋忘初心，要求政府交代回復三年上樓承諾嘅時間表，同埋要繼續監察政府唔可以因為經濟逆轉，就唔再維持平均每年建屋四萬多個嘅目標。事實上，王坤呢番毋忘初心論，同佢於退任寫咗本書嘅內容不謀而合，佢當時力數回歸以來，包括現任特首梁振英在內嘅三名特首，始終未能解決本港房屋問題，王坤嘅一針見血批評，於依家呢個時空仍然係非常適用。
對於王坤嘅肺腑之言，聯會新任主席文裕明都表示認同，表明上任後會向政府「追數」，特別係反映目前公屋住戶面對嘅多項問題，包括要求公屋富戶政策行單軌要延遲推行、鉛水公屋換喉事宜，以及垃圾徵費對公屋戶嘅影響。
未諗過連任 文裕明話專注會務
當問及會否蕭規曹隨，同王坤一樣唔只做一屆聯會主席，文裕明話聯會領導層換屆都係選舉產生，自己目前未考慮連任問題，最重要係專注會務工作。由此觀之，睇嚟就算聯會換咗新任主席，向政府炮轟嘅火力唔會因而減少，張炳良等特別負責覓地建屋嘅高官，無論係表明離任，或者有意過渡至新政府，睇怕都要打醒十二分精神至得嘞！