中環出更：樹根抓緊青春 三周飛五次
前立法會議員鍾樹根（樹根）去年九月無角逐連任後，就聯同前立法會議員黃容根及李國英喺內地大展拳腳，於海南文昌種番薯，樹根最近更成為「空中飛人」，忙到三個星期搭咗五次飛機，包括去廣西同海南各兩次，佢笑言就快「登六」，即月底年屆六十歲，因此想抓緊剩餘青春做啲生產力高嘅嘢，「好過坐喺議會四年先批幾十億」，擺明就踩緊議會拉布浪費時間。
種番薯暫時未回本
樹根於短短三星期飛咗五次，包括廣西同海南各兩次，另一次就係去上海，主要係出席當地農業活動，而佢依家就同廣西嘅公司做緊改善土壤嘅研究，希望可以將啲地變番農地，畀當地農民復耕，而佢太太本身係呢間公司嘅股東。點解係太太，唔係佢自己做股東，樹根話因為財政大權一直喺太太度喎。
講番種番薯嘅最新進展，樹根話雖然目前投資未回本，但都感到好樂觀，依家主要喺網上賣，遲啲打算開設專門店，而內地有關方面對農業亦有補貼，不過佢哋打算將補貼嘅錢畀番農民。
卓妮