中環出更：雙喜臨門黃雅芝會慶爆婚訊
香港鐘表業總會（總會）早前舉行新一屆董事會就職典禮，業界老行尊孫秉樞嘅細仔孫大豪接任新主席。今年適逢總會成立七十周年，當日亦趁機頒發終身傑出成就獎畀孫秉樞，現場氣氛好熱鬧。做咗幾年副主席嘅黃雅芝（Angie）今屆唔再冧莊，事關佢搵到真命天子，即將「嫁雞隨雞」到美國西雅圖定居，專心造人。
洋溢幸福笑容嘅Angie話，佢同未婚夫相識於廿二年前，當時大家都讀緊中學但唔同校，後來失聯，直至去年喺澳門碼頭重逢，男方展開攻勢，最終贏得美人歸。Angie話五月會先喺西雅圖一個水族館內設宴結婚，然後六月份再返香港補擺酒。點解會喺水族館擺酒？因為佢好鍾意奇妙嘅海洋世界。見Angie笑到甜絲絲，真係戥佢開心。
黃錦成話囡囡幸福最緊要
Angie爸爸、總會顧問黃錦成早前喺facebook寫下女兒出閣嘅感言，好感性，佢笑稱冇唔捨得，因為冇嘢緊要過見到囡囡搵到終身幸福。總會前副主席徐珊雯都好開心，仲話西雅圖及香港兩場婚宴都會去飲喎！
同場仲有總會顧問莊學山同陳正欣，期間二人傾得好肉緊，原來講緊深圳嘅經濟規模可能於兩年內追上香港，莊學山話其實香港早已被深圳爬頭，事關佢喺深圳有好多科技公司，內地各省市菁英都向深圳聚集，令當地充滿活力，相反香港就吸引唔到人才，境外人才想申請喺香港工作及居留亦好難，諗起就心急。
卓妮