政情：方國珊自爆落區遇「狂粉」
從政者最驚就係冇人識，所以做過藝人嘅政界中人，就有先天優勢嘞！之不過，同時都有機會帶來唔少煩惱o架！西貢區議員方國珊（哪吒）就係其中一個有煩惱嘅人嘞。佢年輕時曾經拍過電視劇，飾演過哪吒，唔少較年長嘅人士都仲會記得佢扮過呢個角色，但亦為佢帶來瘋狂粉絲，聽落認真頭痛咁喎。
意識到對方想追求即叫停
哪吒話以往做地區工作，都試過遇上瘋狂粉絲，成日去佢嘅辦事處話想見佢一面，佢好快已經意識到對方有啲想追佢，亦好快就叫「Stop（停）」嘞，因為佢唔想喺社區入面同街坊發展感情，至於依家認識佢嘅街坊，唔少都係夫婦二人都識佢嘅，而且多數都係太太鍾意佢先，先介紹另一半畀佢認識。
至於感情方面，佢話自己以往都忙於工作，冇乜點諗感情事，依家就覺得，如果有個人鍾意佢，又支持佢繼續喺社區工作嘅話，先會考慮喎！