政情：白鴿黨 撐完鬍鬚曾 即向漢奸黎匯報
距離特首選舉投票日剩番五日，民主黨（白鴿黨）尋日舉行記者會宣布黨內七名立法會議員全投特首候選人曾俊華（鬍鬚曾），話音剛落，提早離開記者會嘅白鴿黨前副主席單仲偕（騸雞），其後同立法會前議員李永達（高達）一齊到壹傳媒黎智英（漢奸黎）位於何文田嘅寓所密會，令人聯想係咪要向「金主」作匯報；另一方面「搞事四人組」之一嘅白鴿黨創黨主席李柱銘（李漢奸），接力明貶林鄭月娥暗撐鬍鬚曾，仲記得漢奸黎較早時為撐鬍鬚曾，不惜大鬧另一獲泛民畀票入閘嘅胡國興，李漢奸等白鴿黨「老鴿」唔理三七二十一「和應」撐建制派候選人，盲目嘅程度真係瘋狂嚇人。
繼公民黨（公文袋）早前宣布全投特首候選人鬍鬚曾後，白鴿黨尋日早上十一時舉行記者會宣布喺下周日投票撐鬍鬚曾，另會推薦同呼籲黨內廿三名選委投票畀鬍鬚曾，約有十人出席，包括四名現任同前任黨領導層，即胡志偉及黨副主席羅健熙，騸雞同黨前主席楊森等人，四人均為選委。
否認開壞先例 將受巨大壓力
胡志偉喺記者會上否認支持建制派候選人係開咗壞先例，但承認今次決定會令該黨承受非常大壓力，楊森仲話從政數十年未曾以個人名義支持建制派。
喺白鴿黨撐鬍鬚曾後，中午十二時半左右，漢奸黎名下七人私家車抵達黎宅，全車拉上窗簾，喺大閘門關上後，騸雞同高達先後落車，而喺約兩點半，佢哋乘七人車離開，其中面紅紅嘅高達喺荔景落車，佢承認同漢奸黎及騸雞等人食飯，當問及係咪談及選舉，佢略為停頓一下先回應稱「乜都傾吓啦」。
另外，民主300+尋晚開會後公布，一致唔會投票畀林鄭月娥，又話有共識指百分之九十八嘅票會集中投票畀鬍鬚曾。
泛民口裏說不 投票卻很誠實
其實泛民今次為撐鬍鬚曾，被指無乜政治倫理可言，泛民口講反對或撤回全國人大常委會「八三一」決定，要求重啟政改，爭取無篩選嘅政改方案，但講就天下無敵，佢哋支持嘅鬍鬚曾，仍要以人大「八三一」為基礎，只係加咗句無前設嘅諮詢，除此以外亦會就《基本法》第二十三條立法，儘管如此，泛民仍然可以對此視若無睹，紛紛以對方於民調支持度領先，最能夠對抗西環欽點等理由，面不紅耳不赤撐鬍鬚曾。
而最令人嘖嘖稱奇嘅係，泛民兩大政黨公文袋同白鴿黨，連同李漢奸明撐暗撐鬍鬚曾，都係喺漢奸黎於本月十二日喺佢旗下報章撰文，為撐鬍鬚曾狂踩胡國興騸票後出現，再加上白鴿黨宣布撐鬍鬚曾後，就有兩名「老鴿」明目張膽走入漢奸黎寓所，究竟凡此種種，有冇幕後黑手喺背後推波助瀾，相信答案呼之欲出嘞！