政情：中醫未納公僕福利 張雲正代受靶
公務員事務局局長張雲正尋日到立法會公務員及資助機構員工事務委員會，講解公務員醫療福利，期間有唔少議員借機倡納入中醫服務，但係由高永文做局長嘅食物及衞生局負責嘅衞生署同醫管局都冇中醫診所，累到張雲正代高永文受靶嘞！
倡議公務員可享中醫嘅醫療福利並唔係新建議，議員蔣麗芸更話未做議員已經有人提出，另一議員容海恩都話唔明白點解仍未開放中醫服務畀公務員。
畀多名議員狂質，搞到張雲正不斷重複，指現時中醫規管仍未達完善，而且衞生署只係近年先開始籌組規管，又強調呢個講法並非屏障，只係中醫業嘅規管架構基本上仍未成形啫！
其實都有議員明白問題唔係出喺張雲正身上，好似議員葉劉淑儀就直言同張雲正無關，核心係政府無將中醫納入公營醫療架構，揚言會作跟進添！
郭偉強打尖發問捱轟
葉劉除咗還張雲正一個公道外，更幫理不幫親！事緣委員會主席郭偉強為容海恩追問中醫問題，身為容海恩黨友嘅葉劉就力斥郭偉強打尖，認為追問都要排隊，搞到郭偉強要以笑遮醜，臨尾都唔敢再發問，話打尖當問咗喎。
卓妮