政情：為老友入仁濟 楊志雄拉埋囝囝
仁濟醫院早前舉行慈善餐舞會為年度籌款發力，亦象徵候任主席嚴徐玉珊距離坐正嘅日子已進入倒數。「耳機大王」中華廠商聯合會副會長楊志雄（Johnny）為咗撐老友，決定再次重返仁濟做新丁總理，但佢一早已經係仁濟人，仲出出入入董事局好多次，卓妮問佢究竟出入咗幾多次？佢笑稱唔記得咗添！
Johnny話每次加入仁濟都係為咗撐老友，今次返嚟梗係撐嚴太，仲話唔撐唔得添！佢大讚近年仁濟形象愈嚟愈年輕，嚟緊幾位排隊上位嘅副主席都好年輕，未來實有一番新景象，所以佢打算下一屆叫埋阿仔加入仁濟。為撐老友而做新丁總理嘅仲有健康快車香港基金副主席陳明耀，佢同嚴太老公嚴玉麟係工業界多年老友，梗要以行動支持。
50周年 鄭承峰：要重新定位
講到仁濟嘅發展勢頭幾好，主席鄭承峰都好認同。今年適逢仁濟成立五十周年嘅大日子，佢認為係時候思考重新定位，究竟未來發展方向係「立足荃灣，服務全港」，定係繼續「立足荃灣，服務荃灣」喎！查實依家仁濟嘅服務已擴展到港島及九龍，無論如何都唔會只係服務荃灣居民喇！
同場仲有仁濟副主席王賢訊同老友許夏林（Eddie）。Eddie十幾年前為咗氹仔女開心，設計咗一隻表情多多嘅黃色鴨仔，後來更加變成一門生意，至今相關產品多達三、四千款。咁呢隻鴨仔同「變形金剛之父」林亮嘅經典鴨有乜唔同？Eddie笑稱經典鴨嘅表情比較傳統喎。
卓妮