政情：「雙林」同撐成立時計博物館

政府推動產業發展及「再工業化」，業界莫不寄予厚望。尋日香港表廠商會副會長林偉雄同埋做鐘錶業幾十年嘅港澳台灣慈善基金會副主席林俊杰聚首，講起鐘錶界嘅發展及承傳，佢哋都認為政府應該支持業界推動成立時計博物館。

點解突然講起博物館？事關林俊杰用咗十幾年時間鑽研，同台灣南臺科技大學合作製造咗四部古代嘅天文儀器及時計，包括渾儀、漏刻、北宋水運儀及十六世紀機械鐘，唔止還原咗古機械時計嘅成就，亦兼備藝術性。現時呢四部古時計喺台灣展出，遲啲會運返香港開放畀公眾參觀。

林偉雄就話，業界都有推動成立時計博物館嘅諗法，現正尋找可供活化嘅用地，到時呢四部古時計可考慮長期擺放喺館內。相信香港如果有時計博物館，將有助吸引後生仔入行，亦可推動本港嘅特色旅遊。