政情：梁智宏返龍鳳大禮堂 影全家福重溫童年
飲茶梗係要一家人一齊飲先夠過癮，香港有唔少酒家都盛載住大眾嘅共同回憶及成長片段，好似已結業嘅鑽石酒家就係其中一個經典。早前我哋見到「丑生王」梁醒波孫仔兼鑽石酒家後人梁智宏（Andrew），佢就話之前趁沙田香港文化博物館擺展覽時，同十幾個親戚好友一齊去咗睇佢哋鑽石酒家個龍鳳大禮堂，齊齊想當年，仲順便影咗大堆合照，同佢哋廿幾年前嘅舊相玩對比。
以前龍鳳大禮堂見證過唔少甜蜜夫妻嘅誕生同各大喜慶場合，難得博物館趁擺放與清帝大婚相關嘅展覽，期間順道將成個龍鳳大禮堂都擺番出嚟，一枱一櫈都係當年鑽石酒家入面嘅實物。咁難得，Andrew梗係即刻召集番成班親戚一齊重溫童年歲月，喺呢個陪伴大家成長嘅大禮堂前留影，連「牛頭角順嫂」梁葆貞都有嚟。事關順嫂係佢姑媽，一年有一半時間都唔喺香港，Andrew特登去火車站接佢過去㗎！
擺舊相姿勢玩對比
佢哋影咗好多張全家福，話平日都好少有咁嘅機會，部分仲跟番一九八八年影嘅舊相擺姿勢，對比之下見到大家嘅轉變，非常溫馨又窩心。