政情：港獨派陷末路 激進自決 支持度大跌
全國人大會議前日喺北京開幕，國務院總理李克強發表新一份政府工作報告時首次表明「港獨沒有出路」，咁啱得咁蹺，原來主張港獨嘅香港民主進步黨就喺李克強發表呢番說話嘅前夕摺埋嘞，環顧其他主張港獨嘅組織，好似香港民族黨、本土民主前線、青年新政等團體都已經靜晒落嚟，睇嚟已瀕臨瓦解邊緣，而最新嘅民意調查結果更顯示，部分傳統激進派或主張自決嘅政黨，社民連、人民力量同香港眾志嘅支持度大跌，全部排在十大政團榜外。
香港民主進步黨摺埋
喺前年十二月成立嘅香港民主進步黨於本月四日喺facebook（fb）話，經過舊年九月立法會選舉後，組織內大部分意見對發展新路向感到悲觀，導致黨員人數大減，終演變成無法按規定召開年度會員大會，組織日後嘅行動已無法得到授權，因此宣布由即日起停止活動。佢哋都承認現時本土運動正處於低潮，但就預告下一波本土公民運動遲早再會爆發。
其實，本土民主前線嘅發言人黃台仰同梁天琦，以及青政嘅游蕙禎同梁頌恆喺宣誓風波之後，都甚少喺公開場合露面，只係間中喺fb月旦政事，睇嚟好難再起波瀾，而香港眾志主席兼立法會議員羅冠聰曾赴台灣播獨，該黨嘅情況都唔好得去邊。
香港研究協會喺二月二十一至三月二日訪問咗逾千名市民，尋日公布政團評分結果顯示，香港眾志嘅支持度較上次調查再下跌○點一二分至二點一六分，與另一議員陳志全（慢必）做主席嘅人民力量並排第十二位，人民力量嘅評分亦下跌○點一三分至二點一六分。至於立法會議員梁國雄（長毛）所屬嘅社民連嘅支持度跌幅最大，下跌○點二一分至二點二一分，由上次排第十位跌到十一位，跌出十大政團榜外。
調查機構分析，社民連支持度大跌反映市民對該組最近嘅工作表現未感滿意，而喺眾多政團當中，有逾六成政團支持度評分下跌，所有政團支持度評分低於一般水平，反映政團嘅表現同市民嘅期望仍有較大差距。
社民連、人民力量同香港眾志，近排喺立法會不斷拉布，連民生事項都唔放過，難怪會令市民反感，有咁嘅調查結果一啲都唔難理解。