中環出更：陳趙滿菊着高踭鞋呻腳痛
貪靚嘅女士總有幾對高踭鞋，皆因可令身形修長啲。國際華商協進會（華商會）早前舉行周年晚宴，華商會永遠榮譽會長、保良局前主席陳亨利太太陳趙滿菊（Joise）一早到場綵排。卓妮見佢喺台上行行企企一陣之後，落咗台就即刻搵位坐，話對高踭鞋搞到腳好痛，真係有苦自己知。
原來Joise家族最近同一間美國波鞋品牌合作，喺中港同東南亞擴展零售生意，Joise就經常着住呢種又潮又舒適嘅休閒鞋。點知好耐唔着高踭鞋，着一陣就痛到不得了。話時話，如果潮流興着晚裝襯波鞋，相信有唔少女士都會歡呼萬歲嘞！
曹樹華定如淨合作表演
華商會會長羅台秦、永遠榮譽會長李嘉音及副會長吳肖梅都有到場，吳肖梅打點晚宴安排忙到氹氹轉。卓妮見台北經濟文化辦事處處長嚴重光、港澳台灣同鄉會會長林華琴及香港台灣婦女協會會長歐陽珍密密傾，原來傾緊點樣為早前喺港鐵縱火案中受傷嘅台灣女遊客做多啲嘢。
當晚最精彩嘅節目莫過於理事曹樹華同畫家定如淨（Mediha）兩位才女合作，由曹樹華彈奏經典情歌，Mediha即場用畫筆將音樂嘅意境畫出來，不消十分鐘即完成一幅色彩柔和浪漫嘅抽象畫。Mediha第一次喺眾目睽睽下畫畫，原本好緊張，但係投入之後就忘我喇！呢幅名為《音樂的色彩》油畫已被買下，Mediha話會將筆錢捐畀當晚成立嘅「國際華商慈善基金」，認真有愛心。
卓妮