大家一定記得，舊年有位哺乳媽媽被的士司機偷拍並放上網，激起全城震怒。嗰位司機大佬咁無良，固然抵鬧，但民間對餵哺母乳一知半解，搞到哺乳媽媽郁啲就備受歧視，唔通政府又冇責任咩。
餵哺母乳好處多多，早就有醫學證明，母乳營養豐富，唔止可以增強BB抵抗力及有助發育，提升親子感情，哺乳媽媽仲可以減低患癌機會，簡直係一舉多得。近年世界各地都提倡餵哺母乳，自詡係國際大都會嘅香港梗係唔執輸啦，港府開口埋口都話支持，三年前仲成立「促進母乳餵哺委員會」添，但實情係點，睇過咪知囉。
嗱，本報記者巡視全港多區嘅政府設施，發現當局所謂嘅支持得把口嘅咋。好似香港仔、鴨脷洲及上環市政大廈咁，竟然一間餵哺室都冇，哺乳媽媽只能屈就喺傷殘人士廁所或女性更衣室餵哺，既唔衞生，亦唔方便；又好似鴨脷洲風之塔公園及香港仔海濱公園吖，係就係設有哺乳室，弊在重門深鎖，得物無所用；至於其他地區嘅公共圖書館、大會堂、運動場等公共場所，一樣唔見有哺乳設施，即係逼哺乳媽媽喺大庭廣眾餵哺啫。
最好笑嘅係，當局其身不正，仲敦起個款扮晒正義超人，向四百多間私營機構發信，鼓勵佢哋喺旗下公共場所推行「母乳餵哺政策」喎，都唔怕笑甩人棚牙嘅。所謂上樑不正下樑歪，港府自己都唔以身作則，冇帶頭做好榜樣，又有乜資格教人呀，私人企業又使乜聽你支笛呀。正如立法會議員話齋，港府推廣母乳集中喺醫院、母嬰健康院呢啲地方，民間宣傳少之又少，政令不出醫院大門咯喎，咪即係嘥氣。所以話啫，上面嗰位的士司機嘅所作所為雖然離晒大譜，但政府欠缺教育及宣傳亦難辭其咎，搞到今時今日仍有唔少人戴住有色眼鏡，明明係神聖不可侵犯嘅行為都飽受歧視，你話港府該當何罪吖！
真係諗極唔明，港府做乜都鍾意援引外國先例，偏偏推廣母乳餵哺又唔學吓人哋，莫講話西方國家咁先進吖，就算同樣係華人地區嘅台灣咋，早就立法規定一定比例嘅空間必須設立哺乳室，呢啲至係真正與國際接軌吖嘛。家陣睇到喇，港府成日叫人唔好歧視，其實最歧視哺乳媽媽嘅就係政府自己，平機會擺設嚟嘅啫。
講真，喺奶粉未發明之前，古今中外嘅BB都係飲母乳長大，古時候都唔會被歧視，反而喺廿一世紀受盡歧視，話港府仲衰過封建王朝就係咁解。點都好啦，移風易俗唔止需要時間，最重要係政府支持配合，唔好一味葉公好龍吖。