政情：陸頌雄未考牌先買車
啱啱考完車牌嘅人，大多都面對買車煩惱，但立法會議員陸頌雄就屬少數，因為佢未考車已經買咗車。陸頌雄否認心急，笑言係因為車價平先提早買，又話自己係定下目標就向前衝嘅人，次序唔係重點，有信心路試會一Take過成功。
陸頌雄話以前喺天水圍居住同工作，唔使點用車，但舊年出任立法會議員後，經常要來往港島，故萌生考車牌念頭。佢早前完成筆試，下星期跟師傅操車，六月就考自動波私家車路試。
不過，佢尚未正式「揸軚盤」已經成為車主，喺上個月買咗部心儀歐洲四人車。未學車先買車，佢笑言係因為車價平，又話愛車落地唔夠半年，但因為冷門，所以二手價僅為原價六五折，故忍唔住手先買落嚟。佢又話如果成功攞到車牌，會駕車往返立法會，但擔心如行經屯門公路，由於佢首年「P牌仔」車速最多只能達時速七十公里，擔心到時車速太慢會畀其他司機鄙視。
郭偉強教路：有咁慢得咁慢
另一議員兼黨友郭偉強亦喺近年先考到車牌，佢分享其考車一Take過成功嘅心得，指最重要係開得慢，「有咁慢得咁慢」，咁先有時間處理各種路況；另外，佢又提醒路試期間望倒後鏡動作要明顯，確保考官知道你有望鏡喎。