政情：楊章桂芝遊南極 幫團友「追帽」
依家唔少人都選擇去南極探秘，好似香港專業及資深行政人員協會理事楊章桂芝（Cindy）早前亦都同班朋友去完南極旅行，遇到好多有趣嘅經歷，例如追帽喇！
點解要追帽？咪就係因為南極唔可以棄置垃圾及遺下任何個人物品囉！Cindy就笑言有次喺船上，有個團員嘅帽子飛走咗，大家就要一齊追咗差唔多十幾二十分鐘，先追返頂帽返嚟。
而喺南極岸上由於唔方便去廁所，所以佢哋每次逗留約三小時就會乘坐接駁嘅橡皮艇返一返上船，結果花咗唔少時間喺更換救生衣及雪靴上。
今次去南極，佢哋途經巴西同秘魯等地方，去咗世界三大瀑布之一、橫跨巴西及阿根廷嘅伊瓜蘇瀑布。佢話除咗坐直升機高空睇及於阿根廷行近睇外，仲可以喺巴西一邊着住雨褸坐快艇近距離觀賞兼感受瀑布，不過水花太勁，着咗雨褸都係會濺到全身濕晒，笑言下次要戴泳鏡先得，又透露阿根廷嗰邊嘅瀑布比較靚，但係要由巴西嗰邊望過去喎。