「尋尋覓覓，冷冷清清，悽悽慘慘戚戚。乍暖還寒時候，最難將息。」李清照呢幾句詞除咗適合形容呢幾日嘅天氣，更加係本港旅遊業現況嘅最佳寫照。冬天過去始終都會迎來春天，之但係旅遊業冰河期伊於胡底，就真係冇人話得埋嘞。
睇吓旅發局數字就知幾大鑊。舊年訪港旅客約五千六百萬人次，比前年下跌百分之四點五，其中內地旅客更加大跌近百分之七；最慘係唔旺丁之餘亦唔旺財，整體過夜客跌半個百分點，人均消費較前年下跌超過百分之八。展望今年情況更加不妙，預計整體旅客人數將進一步縮水至五千五百多萬人次，都咪話唔得人驚。
話時話，今年適逢回歸二十周年，將會有大量紀念活動，照計應該吸引到唔少旅客，點解旅發局仍然睇淡後市？佢哋話主要係因為多個國家及地區放寬內地客簽證，政府對個人遊實施一周一行以及人民幣貶值等。冇錯，內地豪客水頭充足，出手大方，愈來愈多地方爭住搶食呢個大餅，但點解內地客對有啲地方情有獨鍾，唯獨對香港望而卻步？日圓夠同港元一樣強勢喇，內地土豪咪又係湧住過去「爆買」。
所以話，香港留唔住客人，始終要從自己身上搵原因。雖然「驅蝗」、「光復」等鬧劇早已收皮，今年春節亦總算平安無事，但正所謂一朝被蛇咬，十年怕井繩，內地客只要有一次被歧視甚至圍罵嘅經歷，見過鬼怕黑唔在講，返到去一傳十十傳百，香港個朵就係咁搞臭晒。加上部分無良業界竭澤而漁，粗口鬧人有之，激死旅客有之，打死旅客有之，係人都怕怕喇。
冇錯，內地土豪係財大氣粗，質素參差，但外國人唔理內心點諗都好，睇錢份上都會笑臉相迎，服務周到，唔會好似部分香港人咁做到出晒面，結果一小撮人搞搞震令到大家冇啖好食，同旅遊相關行業更加係慘上加慘，北大人話「香港亂，大家一齊埋單」，咪就係咁解囉。
冇計喇，有啲香港人嘅心態就係咁扭曲，以前內地一窮二白就嫌人哋窮親戚影衰自己，好嘞，依家人哋身光頸靚你又話人哋「恩主心態」、「文明質素低」，查實周街圍人甚至喊打喊殺，比起打尖隨街大小便，文明程度只係一百步笑五十步，難為有啲人仲話想吸引高增值、高質素旅客，睇吓自己乜嘢新絲蘿蔔皮先喇！
開講有話，灑掃庭園，以待賓客。香港一日唔省番靚「好客之都」個招牌，一日都唔使旨意旅客幫襯。講到底，世界咁大，好玩嘅地方多的是，冇人會蠢到貼錢買難受啫，係咪？