政情：沈祖堯10K完賽 全靠老婆陪練
將喺一八年中卸任嘅中文大學校長沈祖堯，上星期用咗一個鐘零七分鐘跑完十公里賽事。佢尋日發表網誌，大爆自己並唔係運動健將，只係因為幾年前察覺到身體機能衰退，先開始做番運動，仲話今次跑得完都係靠太太平日踩住單車陪佢練跑喎。
沈祖堯喺網誌分享完成十公里賽事嘅經歷，話一口氣跑完全程，中途完全無停低過。現年五十七歲嘅佢笑言自己唔係運動健將，中學時玩得比較出色嘅都只不過係羽毛球，呢次跑完十公里只係證明咗自己嘅意志可以克服身體嘅軟弱，令自己年輕咗又樂觀咗。
佢透露幾年前發現視力開始模糊、關節嘞嘞作響、血壓血糖又開始上升，去到舊年終於下定決心，戒口唔食甜嘢，每朝六點半就去健身，或者沿着大埔同科學園跑步，初時有試過肌肉痠痛，好彩有學生同教練支持，仲特別感謝太太沿途鼓勵，踩住單車陪佢練跑，最後先有咁嘅成果。
佢仲話去過唔少地方跑步，包括德國柏林嘅勃蘭登堡門、倫敦白金漢宮、牛津大學公園、澳洲悉尼海濱同美國波士頓等，雖然每一處佢都樂在其中，但晨光熹微嘅吐露港，先係佢最喜愛嘅跑步場地。