政情：太太想追個女葛兆源O晒嘴

荃灣區議員葛兆源與太太、元朗區議員劉桂容（阿容）結婚多年，但仲未為佢哋已經三歲幾嘅囝囝添多個伴喎。不過，阿容早前出席活動時大爆自己想追多個，唔在場嘅老公聽番呢件事就大表驚訝，唔通佢哋無傾過呢樣嘢？

阿容早前出席活動時，為表達對男士侍產假嘅關注，竟然大爆自己正在打算追多個小朋友。就係呢番說話，令到在場人士都認為佢哋夫婦已有晒生育計劃，不過冇出席活動嘅葛兆源聽番朋友引述後，隨即表現出一副晴天霹靂嘅樣子，更直言自己壓力即刻大咗，認真搞笑喇！

其實葛兆源咁大反應並唔係唔知太太想追多個小朋友，只係冇諗過太太會咁公開咁講啫，直言佢哋早有打算，一直希望喺立法會選舉過後、毋須應付選舉時去實行呢個計劃，最好可以湊個「好」字咁話。不過，葛兆源話依家仍然未有好消息，睇嚟佢哋要繼續努力先得嘞！