政情：陳茂波裝修官邸「僅」花83萬
陳茂波（波叔）升呢做咗財政司司長後，早前公布呢屆政府最後一份預算案，被外界狂轟係「守財奴」後，跟住就爆出佢花約二百萬元公帑豪裝官邸。追問咗幾日，財政司司長辦公室發言人尋日傍晚先回應事件，指修葺官邸涉約八十三萬元開支，並強調工程屬於官邸保養維修嘅必須部分。之不過，呢屆政府只剩低四個月任期，分攤嚟計，每個月都用咗廿萬元喎。
波叔將於下月遷入位於南區壽山村道嘅財政司司長官邸，官邸現正進行翻新工程，財政司司長辦公室尋日傍晚發出新聞稿回應傳媒查詢，發言人指出，維修工程費用為八十三萬元，當中三十九萬元修復建築物同地台、四萬元更換地氈、十八萬元修復外牆油漆及十六萬元更換家具同裝置，再加上六萬元工程應急費用，而工程將於三月完工。
強調保養工程屬必須
發言人又表示，官邸係一座二級歷史建築，已有約八十年歷史，而官邸上一次大型維修已經係喺二○○七年，唔少設施已經有所破損，相關部門係根據既定程序，進行需要嘅修葺工作，強調工程均屬官邸保養維修嘅必須部分。