中環出更：黃汝璞去到邊都瞓得着

講起出差，好多人都唔習慣瞓「生暴床」，不過喺Marina嘅字典入面就冇「生暴床」呢樣嘢，事關佢以前經常出差，通常四十八小時來回又要繼續開工，所以無論去到邊度佢都會爭取時間休息，試過喺冇冷氣、冇廁所嘅地方，佢一樣瞓得着。佢每朝起身仲一定要練氣功，做足四十分鐘站樁，練完頭腦特別清醒喎。

謝邱安儀堅持公私分明

日前香港女工商及專業人員聯會公布三年一度嘅「傑出專業女性及女企業家選舉」資格及報名日期，一班執委會成員包括理事麥瑞琼、蔡美碧、韓淑儀、曾詠恆及前得獎者謝邱安儀均有出席。

麥瑞琼退休前已經一早諗定退休後會點樣，所以退休後好快適應。

曾詠恆（左）同謝邱安儀（右）分享女士喺職場上嘅長短處。（陳嘉順攝）

講起女士職場上的優缺點，謝邱安儀話初次見面時有機會被質疑工作能力，但其實對多幾次就見到真章，對方會知你做得嘢。不過女人唔補好易老，工作咁忙好易捱殘，佢就堅持應酬永遠只食七成飽保持身形，工作同家庭私務亦要分得好清，工作時工作，同家人一齊就唔好掛住覆電話，確保兩方面時間都用得其所。

退咗休幾個月嘅麥瑞琼就笑言現時生活好自在，剛同朋友去完歐洲及西雙版納旅行。一向係職場叻女嘅佢仲話退休前要不斷同自己講退休後會冇車揸、冇同事成日打畀佢，咁一退休就能適應。

韓淑儀就透露以前對自己要求好高，對女兒亦一樣，但笑言原來當對住個孫嘅時候就會完全相反喎。

卓妮