「離開容易，留低卻需要好大勇氣。」老董呢句名言一向被港產官僚奉為座右銘，而啱啱宣布走頭、人稱「吳得掂」嘅教育局局長吳克儉更深得箇中三昧。佢老哥上任咁耐畀市民鬧足咁耐，死撐到依家都算勇氣可嘉咯。
官僚走頭，例牌要搵個體面嘅下台階，有人因為「腳痛」，有人因為要「照顧家人」，至於吳得掂，就話自己頭髮變白，做完今屆任期後會退休，做多啲運動陪多啲屋企人，兼每個月讀三十本書喎。
吳得掂係咪「告老還鄉」，真係要問吓佢自己至知，大家淨係見到佢老哥前幾日仲染到個頭黑一黑，嗰陣時唔單止未萌去意，仲口口聲聲要集中注意力完成手上工作，冇諗留任問題，依家一話唔撈啫就突然「一夜白頭」，係人都知咩事喇。不過點都好，吳得掂上任以嚟撞板多過食飯，民望長居問責局長包尾大幡，今次自己知衰，順應民意，總算係「掂」番一次。
唔係講笑㗎，由國民教育到TSA，吳得掂有邊次唔係搞到一鑊粥o架？佢嘅失言語錄更加厚過本電話簿，咩「學童自殺係因為生涯規劃做得差」、「唔鍾意學校考TSA大可以轉校」，好似唔辣㷫市民唔安樂咁；佢仲衰到貪威識食，周遊列國賞櫻花同（目及）制服學生妹，換着喺外國，是但衰以上一瓣都一早畀人掃地出門喇，係香港咁獨特嘅「高官問責制」至畀佢賴皮到任滿嘅咋。
最好笑嘅係，吳得掂居然好意思自吹自擂，話自己已經完成特首上任時嘅教育承諾，口就講明白社會對佢嘅工作有批評，轉個頭左一句國民教育喺佢上任前已經有，右一句個別學校推行TSA有偏頗，總之賴得就賴，卸得就卸，講到好似咩都唔關佢事咁，簡直吹脹！
吳得掂終於走人，全港家長同學生係時候請小鳳姐出場，「熱烈地彈琴熱烈地唱」。之不過咁，現屆政府拉雜成軍，濫竽充數，講到廢柴，絕對唔止吳得掂一條，其他高官嘅甩漏嘢，同樣數到天光都數唔完，莫講話市民鬧爆，連「好打得」嗰位都認班局長係「雜牌軍」，搞到佢要好似湊仔咁湊，撈埋奶媽嗰份。
今屆政府已經進入倒數階段，廢官時日無多，好應該以吳得掂「自我了斷」為榜樣，咪再阻住地球轉。話時話，除咗吳得掂之外，運房局、商經局、食衞局以及勞福局局長等據聞都唔會過渡到新班子，下屆政府想唔「大換血」都唔得。計功夫茶話齋，無論邊個新特首上場都好，最緊要都係帶眼識人，「能不稱其位，其殃必大」，市民呢幾年付出嘅代價實在太大嘞！