政情：主席變理事 鄧飛跌鑊甘
話說教育工作者聯會（教聯會）嘅鄧飛，早前喺選委會選舉中，冇回覆選舉管理委員會（選管會）嘅確認信，被選舉主任裁定提名無效，搞到冇得出選，真係甩晒轆，仲被指係「豬隊友」添！教聯會尋日換屆就職，本身係主席嘅鄧飛，換屆後只係做理事，突然由高位回落，令人懷疑係咪同佢之前喺教育界選委選舉報名甩轆有關，搞到被人追究，今屆冇得做主席？
教育界一向係非建制派嘅票倉，作為該界別建制陣營少有有機會能夠拎到一席選委嘅鄧飛，竟然因為大意而冇得出選，鄧飛喺報名當日先發現自己唔喺選民名冊上，當時佢堅持報名，但亦難逃被取消資格（DQ）嘅命運。佢事後強調無搬過屋，亦從來無收過確認信，對被裁定提名無效感到莫名其妙。
據知，隊友之後都有話佢，點解咁烏龍？點解會唔知？如果佢一早知道就有得補救，就算報名知有事，撤回報名，當冇報過就冇人覺，唔使通街都知，但佢又唔撤，以為係政府搞錯，自己仲可以選，仲要搞一輪，等人DQ取消資格就醜怪喇！
稱太忙 換屆唔連任
不過，有指鄧飛今次冇得做主席，其實同報名甩轆無關，事關佢上任主席冇幾耐，已經發現自己工作太忙冇時間，喺教聯會嘅活動都唔多出現，所以一早已經講明，換屆後唔做主席（口架）嘞！但講真嗰句，如果一早已經忙到出席唔到活動，其實上屆都唔應該接任主席呢個位啦，依家肯退落嚟讓畀其他人，都係應有之義。
黃錦良接任主席
至於今屆主席就由上屆副主席黃錦良接任，黃錦良係黃楚標學校校長，而原本係理事嘅港專學校校長陳卓禧就升為副主席，香港道教聯合會圓玄學院陳呂重德紀念學校校長梁俊傑，上屆連理事都唔係，但就直接做副主席，至於黃均瑜與周世耀就分別連任會長及副會長。