中環出更：電動車唔免稅 陳正欣無興趣
政府早前發表新一份財政預算案，當中提出唔再全數豁免電動私家車首次登記稅，改為設九萬七千五百元嘅登記稅寬免上限。卓妮尋日喺沙田馬場見到保良局總理陳正欣同女兒Laverna，陳正欣就話豁免首次登記稅係買電動車嘅最大吸引力，冇咗之後即刻吸引力大減。
陳正欣指出，正常買愈貴嘅車，需要繳交的稅項百分比就愈高，因為較便宜嘅車基本上都係用嚟代步，相反貴價車則係奢侈品，所以按價錢嚟計收唔同比例嘅稅都係合理嘅。但之前豁免電動私家車首次登記稅，就令到買電動車相比其他同一價錢嘅車畀少一大截稅，可以話有啲唔公平，但亦因此令電動車多咗人買，推廣環保。但對佢嚟講除咗環保啲之外，如果冇咗個優惠，亦冇咗動力買。Laverna都認同爸爸所講，間中都有駕車嘅佢仲話最愛汽車嘅引擎聲，感覺夠實在，電動車就太靜唔多習慣。
鄭錦鐘睇極都唔啱心水
轉頭見到深水埗區撲滅罪行委員會委員鄭錦鐘同太太，一講起電動車，鄭錦鐘就話之前真係有心去睇過同試過，但有次佢一坐上朋友部電動車時，就因為着住短褲，一上一落時畀個座位刮到個膝頭兩次，之後佢再睇過其他牌子嘅電動車，都係覺得唔合眼緣，所以就冇買到。佢話雖然嚟緊冇咗豁免首次登記稅之後電動車會貴咗好多，不過佢就覺得睇啱先係最緊要，唔適合嘅話就算平啲都冇用。
政府伙伴倡自強計劃諮詢委員會主席蕭楚基亦係愛車之人，佢話早前都諗過換電動車，長遠係環保啲，但屋企暫時已有六部車，分別係自己同埋兩個仔等家人使用，全部都仲係好新，又唔使換車住，所以唔再買多部嘞！
卓妮